— Валерий Валерьевич, эйигин болдьох иннинээҕи быыбарга кыайбыккынан истиҥник эҕэрдэлиибит!
— Махтанабын.
— Үлэҕэ-хамнаска инники былааныҥ туһунан кылгастык сырдатыаҥ дуо?
— Эрдэ этиллибитин курдук, быыбар иннинээҕи бырагыраамабар суруллубут, тиһиллибит былааннары олоххо киллэрэрдии үлэлиир санаалаахпын. Ол курдук, доруобуйа харыстабылын таһымын улууска үрдэтии, нэһилиэнньэлэри газтааһын, таас оскуолалары, оҕо уһуйааннарын, култуура, спорт дьиэлэрин тутуу, хаарбах дьиэттэн көһөрүү бырагырааманы нэһилиэктэргэ киэҥник тарҕатыы үлэтин саҕалыахпыт.
— Сүрүн болҕомтону туохха туһаайар соруктааххын?
— Улууспут хас биирдии олохтооҕо олоҕо-дьаһаҕа тупсарыгар, улууска саҥа наадалаах, туһалаах исписэлиистэр кэлиилэригэр, тыа сирэ, тыа хаһаайыстыбата улууска тэтимнээхтик сайдарыгар болҕомтобун күүскэ ууран үлэлиэм.
— Дуоһунаскар бастакы үлэҥ күнүгэр бастакы дьаһалыҥ ханныгый?
— Бу кэлбит саҥа 2024 сылы «Түмсүү сылынан» бигэргэтии дуоһунаспар киирэн баран бастакы уураахпынан буолуо. Үөһээ Бүлүү дьоно-сэргэтэ түмсүүлээхпитинэн, эйэлээхпитинэн биллэбит.
— Быыбардааччыларга туһаайан тугу этиэҥ этэй?
— Бастатан туран, бу улуус Аҕа Баһылыгын талар сүрүн быыбарга көхтөөх кыттыыны ылбыккыт иһин хас биирдии улуус быыбардааччытыгар иһирэх махталбын тиэрдэбин. Итиэннэ түмсүүлээх, эйэлээх буоларга, бииргэ сайдыы туһугар үлэлииргэ-хамсыырга ыҥырыам этэ. Норуот күүһэ — көмүөл күүһэ!
Кэпсэттэ Кристина Яковлева.
